ألعاب الفيديو من الأشياء اللي يحبها وايد من الأطفال اليوم. لكن في كثير من الأحيان، الأهل يكونون محتارين إذا هالألعاب مناسبة لأعمار عيالهم ولا لا. في هالمقال، بنساعدكم بطريقة بسيطة تعرفون إذا اللعبة مناسبة لعيالكم ولازم تجربونها.

1. التأكد من تصنيف العمر

أول خطوة هي تشوفون تصنيف العمر على اللعبة. كل لعبة عندها تصنيف يقول لكم لأي عمر تكون مناسبة. تاكدو من الحصول على المعلومة من الجهات المعتمدة اللي تساعدكم في تحديد إذا اللعبة مناسبة لعمر عيالكم ولا. مثلاً، ألعاب العنف أو اللي فيها كلمات غير مناسبة بتكون مخصصة للأعمار الكبيرة، مثل 16 سنة أو أكثر. بينما الألعاب التعليمية واللي تكون ممتعة بدون عنف غالباً تكون مخصصة للأعمار الصغيرة مثل 7+.

وهذي بعض الجهات:

• ⁠الإمارات: موقع تصنيف (sannif.ae)

• ⁠أوروبا: موقع بيجي (pegi.info)

• أمريكا: موقع إيسرب (esrb.org)

  
  

2. قراءة تقييمات اللعبة

بعد ما تختارون لعبة معينة، حاولوا تقرأون تقييمات الناس اللي جربوها. هذي التقييمات بتعطيكم فكرة عن محتوى اللعبة وأي مميزات فيها مثل هل فيها مشاهد عنف، أو كلمات ما تصلح للياهل. بعض الألعاب ممكن يكون فيها مشتريات داخل اللعبة أو تفاعل مع لاعبين آخرين عبر الإنترنت، وبهذي الطريقة تعرفون شنو اللي ممكن يصير داخل اللعبة.

3. مشاهدة مقاطع فيديو للعبة

إذا بعد التقييمات لا زلتوا مو متأكدين، تقدرون تشوفون فيديوهات للعبة على منصات مثل YouTube. هذي المقاطع بتبين لكم كيف تكون اللعبة من الداخل، وشنو اللي بيسويه اللاعبين. لما تشوفون الفيديو، بتعرفون إذا اللعبة مناسبة لعيالكم ولا لا.

4. التجربة بنفسكم

واحدة من أفضل الطرق لتعرفون إذا اللعبة مناسبة هي تجربونها بنفسكم. جربوا تلعبون اللعبة لفترة قصيرة. بهالطريقة بتفهمون المحتوى وكيف يكون اللعب، وهل في شي ما يعجبكم في اللعبة.

5. الحديث مع عيالكم عنها

من المهم تتكلمون مع عيالكم عن الألعاب اللي يلعبونها. اسألوهم عن اللعبة وشوفوا إذا هم حاسين إنها مناسبة لهم. الحوار بيساعدكم تفهمون رأيهم وتكتشفون إذا اللعبة تأثر عليهم بطريقة ما.

6. استخدام أدوات التحكم الأبوي

أجهزة اللعب الحديثة مثل PlayStation وXbox وNintendo Switch فيها أدوات للتحكم الأبوي. هذي الأدوات تساعدكم في تقييد الألعاب اللي يلعبها عيالكم بناءً على أعمارهم. تقدرون تحددون شنو الألعاب اللي تناسبهم وتمنعون اللي ما تصلح لهم.

7. المراقبة والتحديث

بعض الألعاب تتغير مع التحديثات، ممكن يضيفون فيها أشياء جديدة. فحاولوا تتابعون الألعاب اللي يلعبها عيالكم بشكل مستمر، وتعرفون إذا صار في أي تغييرات فيها.

 ألعاب الفيديو ممتعة ومفيدة إذا اخترنا الألعاب المناسبة لأعمار عيالنا. لما نشوف تصنيف العمر، نقرا التقييمات، نشوف الفيديوهات، ونتكلم مع عيالنا، نقدر نضمن إنهم يلعبون ألعاب تناسبهم وتكون آمنة. وباستخدام التحكم الأبوي، نقدر نحميهم من المحتويات اللي ما تناسبهم.