الصوف من الأقمشة الراقية والحساسة اللي تحتاج عناية خاصة وقت الغسيل والتجفيف عشان تحافظين على ملمسه الناعم وشكله الحلو. بس مرات تظهر بعض المشاكل مثل انكماش الصوف أو تغير شكله بعد الغسيل، عشان نتجنب المشاكل هذي يجب معرفة الطريقة الصحيحة للعناية بهالنوع من القطع.

بعد اتباع خطوات فرز الملابس اللتي تم تبسيطها في مقال لوحة الكانفا لفرز الملابس هذا شرح اكثر لكم عن طريقة التعامل مع القطع الصوفية اللي يضمن لكم ملابس صوفية ناعمه ونظيفة. والخطوات كالتالي:

1. التحضير قبل الغسيل

قبل لا تبدين بعملية الغسيل، لازم تجهزين قطعة الصوف بشكل صحيح:

• طوي او لفي القطعة بطريقة Rolling.

• بعدين لفيها وحطيها في كيس شبكي عشان تحميها من الاحتكاك وقت الغسيل.

• إذا الكيس كبير، ثبتيه بدبابيس.

2. اختيار دورة الغسيل المناسبة

الصوف حساس للحرارة العالية والحركة الزيادة، لذلك:

• استخدمي دورة غسيل خاصة للصوف أو الملابس الحساسة (Delicate Cycle)

• استخدمي الماي البارد فقط لتجنب انكماش الألياف.

3. استخدام المنظف المناسب

نوع المنظف مهم جدًا لحفظ جودة الصوف:

• استخدمي منظف لطيف مخصوص للصوف.

• ابعدي عن المبيضات أو المنظفات القوية اللي ممكن تضر الألياف واللتي تحتوي على الانزيمات.

4. الغسيل اليدوي كبديل

إذا كنتِ خايفة على القطعة أو كانت حساسة وايد:

• غسلي الصوف بيدج في ماي بارد وشوية منظف.

• حركي القطعة بلطف ولا تفركينها عشان ما تتمدد الألياف.

5. التجفيف الصحيح

أحد الأسباب الرئيسية لانكماش الصوف هو التجفيف الغلط:

• لا تحطين القطعة في المجفف أبدًا.

• بعد الغسيل، لفي القطعة في منشفة نظيفة واضغطي برفق عشان تشلين الماي الزايد.

• افرديها على سطح مستوي وخليها تنشف في الهوا بعيد عن الشمس.

6. تقليل عدد مرات الغسيل

الصوف ما يحتاج غسيل متكرر. إذا ما كانت القطعة متسخة أو عندها ريحة، كفاية تهويتها عدل.

نصايح إضافية:

• دوم تأكدي من قراءة تعليمات العناية المكتوبة على بطاقة الملابس.

• إذا انكمشت القطعة من الغسيل الخاطئ، جربي تمديدها وهي رطبة وافرديها على سطح مستوي للتجفيف.

بالعناية الصحيحة، بتقدرين تحافظين على ملابس الصوف ناعمة وحلوة لسنين طويلة.